ҚР ҰФҒО-на Partners In Health халықаралық ұйымының өкілдері келді

2026 жылғы 4 тамызда Қазақстан Республикасы Денсаулық сақтау министрлігінің Ұлттық фтизиопульмонология ғылыми орталығына (ҚР ҰФҒО) Partners In Health (PIH) халықаралық ұйымының өкілдері — Бетси Морган (Betsy Morgan), Хантер Морган (Hunter Morgan) және Мэдлин Айрленд (Madeline Ireland) келді.

Бетси Морган мен Хантер Морган туберкулезбен күрес бағдарламаларына қаржы тартуға және ауру ауыртпалығы жоғары елдердегі денсаулық сақтау жүйелерін нығайтуға бағытталған қайырымдылық және адвокациялық қызметпен белсенді айналысады. Мэдлин Айрленд Partners In Health ұйымының қызметкері және туберкулезбен күрес саласындағы халықаралық жобаларды іске асыруға қатысады.

Сапар барысында қонақтар Ұлттық фтизиопульмонология ғылыми орталығының қызметімен, Қазақстан Республикасының Ұлттық туберкулезге қарсы бағдарламасының ұйымдастырылуымен, туберкулезді диагностикалау, емдеу және алдын алудың заманауи тәсілдерімен, сондай-ақ еліміздің туберкулездің дәріге төзімді түрлерімен күрестегі негізгі жетістіктерімен танысты.

Кездесу барысында Partners In Health ұйымымен бірлескен бастамаларды іске асыру мәселелеріне ерекше назар аударылды. Атап айтқанда, дәріге төзімді туберкулезді диагностикалау және емдеуді жетілдіруге, пациентке бағдарланған тәсілді енгізуге, ғылыми зерттеулерді дамытуға және ұлттық туберкулезге қарсы қызметтің әлеуетін нығайтуға бағытталған жобалар талқыланды.

Кездесу қорытындысы бойынша тараптар одан әрі ынтымақтастықтың перспективаларын талқылап, тәжірибе алмасты және Қазақстандағы туберкулезге қарсы медициналық көмектің тұрақты, заманауи әрі тиімді жүйесін дамытуға ортақ бейілділіктерін растады.